Luke 2

Ukuzalwa KukaJesu

1Ngalezozinsuku uKhesari Agastu wakhupha isimemezelo wathi akube lokubalwa kwabantu kulo lonke ilizwe lombuso wamaRoma. 2(Lokhu kwakuyikubala kokuqala okwenzakala uKhwirinu engumbusi waseSiriya.)

3Wonke umuntu waya edolobheni lakibo wayabhalisa.

4Kwathi-ke uJosefa laye wahamba esuka edolobheni leNazaretha eseGalile waya eJudiya, eBethilehema idolobho likaDavida, ngokuba waye ngowendlu losendo lukaDavida.

5Wayakhona ukuyabhalisa eloMariya, owayesethembise ukwendela kuye, esekhulelwe.

6Bathi bekhonale safika isikhathi sokubelethwa komntwana, 7wazibula ngendodana. Wayigoqela ngamalembu wayilalisa emkolweni wokudlela izifuyo ngokuba babengelandawo endlini yezihambi.

Abelusi Lezingilosi

8Kwakulabelusi behlala emlageni eduze kwalapho, belinda imihlambi yabo yezimvu ebusuku. 9Ingilosi yeNkosi yabonakala kubo, inkazimulo yeNkosi yakhanya ibazingelezile, ngakho besaba kakhulu. 10Kodwa ingilosi yathi kubo, “Lingesabi. Ngililethele izindaba ezimnandi ezentokozo enkulu ezakuba ngeyabantu bonke.

11Lamuhla lizalelwe uMsindisi emzini kaDavida; unguKhristu iNkosi. 12Lokhu kuzakuba yisiboniso kini: Lizafumana umntwana egoqelwe ngamalembu elele esibayeni.”

13Masinyane kwaqhamuka ixuku lebandla lasezulwini likanye lengilosi lidumisa uNkulunkulu lisithi,

14“Inkazimulo kuNkulunkulu phezulu kwaphezulu, emhlabeni ukuthula ebantwini abathokozelwa nguye.”

15Kwathi izingilosi sezibatshelile zabuyela ezulwini, abelusi bakhulumisana bathi, “Kasihambeni siye eBethilehema siyobona into le esiyenzakele, iNkosi esisitshele ngayo.”

16Bahle basuka ngokuphangisa, bafica uMariya loJosefa losane olwalulele emkolweni wokudlela izifuyo. 17Bathi sebembonile umntwana balandisa ilizwi mayelana lalokho ababekutsheliwe ngomntwana lo, 18kwathi bonke abalizwayo bamangaliswa yilokho abakuzwa ngabelusi. 19Kodwa uMariya wazenza igugu zonke lezi izinto wazizikisa enhliziyweni yakhe.

20Abelusi babuyela, bedumisa njalo bebabaza uNkulunkulu ngezinto zonke ababezizwile njalo bazibona, zaba yikho kanye ababekutsheliwe.

UJesu Uyethulwa Ethempelini

21Ngosuku lwesitshiyambili, sekuyisikhathi sokuthi asokwe, wethiwa ibizo elithi nguJesu, ibizo ayelithiwe yingilosi engakamithwa.

22Kwathi lapho sesiphelile isikhathi sabo sokuhlanjululwa mayelana loMkhuba kaMosi, uJosefa loMariya bamusa eJerusalema ukumnikela eNkosini 23(njengokulotshiweyo eMthethweni weNkosi ukuthi, “Lonke izibulo lesilisa lifanele linikelwe eNkosini”), 24njalo kwenziwe umhlatshelo kulandelwa lokho okutshiwo nguMthetho weNkosi othi: “amajuba amabili loba izinkwilimba ezisencane ezimbili.”

25Kwakukhona eJerusalema indoda eyayithiwa nguSimiyoni, eyayilungile, ikholwa. Yayilindele ukududuzwa kuka-Israyeli, njalo uMoya oNgcwele wawuphezu kwayo.

26Kwakwambuliwe kuye nguMoya oNgcwele ukuthi wayengayikufa engakaboni uKhristu weNkosi.

27Waholwa nguMoya wangena emagumeni ethempeli. Kwathi abazali sebemlethile umntwana uJesu lapho ukumenzela lokho okwakufunwa ngumkhubo woMthetho, 28uSimiyoni wamgona ngezingalo zakhe wadumisa uNkulunkulu esithi:

29“Nkosi, Mhlekazi, njengoba wavele wathembisa, manje-ke iyekele ihambe ngokuthula inceku yakho.

30Ngokuba amehlo ami aseyibonile insindiso yakho,

31oyilungisileyo phambi kwabantu bonke,

32ukukhanya kokwambulela abezizwe lokwenkazimulo yabantu bakho aba-Israyeli.”

33Oyise lonina womntwana bamangala kakhulu ngalokho okwakukhulunywa ngaye.

34USimiyoni wasebabusisa, wathi kuMariya unina: “Umntwana lo umiselwe ukuwa lokuvuka kwabanengi ko-Israyeli, lokuba yisibonakaliso esizagconwa, 35ukwenzela ukuthi imicabango yabanengi ivele obala. Njalo inkemba izawugwaza umphefumulo wakho lawe.”

36Kwakukhona njalo umphrofethikazi, u-Ana, indodakazi kaFanuweli, owesizwana sika-Asheri. Wayesemdala kakhulu: wayephile lomkakhe okweminyaka eyisikhombisa ngemuva kokwenda kwakhe, 37wasesiba ngumfelokazi waze waba lamatshumi aficamibili lane ubudala. Kazange lanini asuke ethempelini kodwa wayekhonza ubusuku lemini, ezila njalo ethandaza.

38Weza kubo ngalona lelo ithuba, wabonga kuNkulunkulu, wakhuluma ngomntwana kubo bonke ababe lindele ukuhlengwa kweJerusalema.

39Kwathi lapho uJosefa loMariya sebekwenzile konke okwakufuneka ngoMthetho weNkosi, babuyela eGalile, edolobheni lakibo elaseNazaretha.

40Umntwana wakhula, waqina; wagcwala inhlakanipho, njalo umusa kaNkulunkulu waba phezu kwakhe.

Umfana UJesu Esethempelini

41Iminyaka yonke abazali bakhe baya eJerusalema belanda uMkhosi wePhasika.

42Kwathi eseleminyaka elitshumi lambili baya eMkhosini njengenjayelo. 43Kwathi uMkhosi usuphelile, abazali bakhe sebebuyela ekhaya, umfana uJesu wasala eJerusalema, kodwa bona belibele.

44Bazihambela ilanga lonke bona becabanga ukuthi ukhona edwendweni lwabo. Base beqalisa ukumdinga phakathi kwezihlobo zabo labangane.

45Bathi sebemswele babuyela eJerusalema bayamdinga. 46Ngemuva kwezinsuku ezintathu bamfumana emagumeni ethempeli, ehlezi phakathi kwabafundisi, elalele njalo ebabuza imibuzo. 47Wonke umuntu owamuzwayo wamangala ngokuzwisisa kwakhe kanye lezimpendulo zakhe.

48Abazali bakhe bathi bembona bamangala kakhulu. Unina wathi kuye, “Ndodana, kungani usinqinekisa kangaka? Uyihlo lami besesikhathazekile sikudinga.”

49Yena wabuza wathi, “Belivele lingidingelani kanti? Belingazi yini ukuthi bekumele ngibe sendlini kaBaba?” 50Kodwa kabazwisisanga lokho ayekutsho kubo.

51Wasehamba labo eNazaretha wahlala ebalalela. Kodwa unina wazenza igugu zonke lezi izinto enhliziyweni yakhe.

52UJesu wakhula ngenhlakanipho, langomzimba langokuthandwa nguNkulunkulu labantu.